Sunday 9 February 2014

မြန်မာပိုင်ကျောင်း ဖြစ်လိုလျင်

လွန်ခဲ့သော တစ်နှစ်ကျော်က တစ်ယောက်တစ်သောင်း မြန်မာပိုင်ကျောင်းဆိုပြီးတော့ မြန်မာပိုင် ဘုန်းတော်ကြီးကျောင်း ပေါ်ပေါက်လာနိုင်တဲ့ နည်းလမ်းလေးကို ရေးသားတင်ပြခဲ့ဖူးပါတယ်။ ခု ဒီစာကိုလည်း ရေးမယ်လို့ ကြံရွယ်နေခဲ့တာ အတော်ကြာခဲ့ပါပြီ။ ခုတော့ ကိုဇာနည်ရဲ့ ဖေစ်ဘုက်ထဲကစာကို ဖတ်မိတော့မှပဲ မဖြစ်မနေ ရေးဖြစ်တော့တယ်။

ခုဆိုရင် ပထမဦးစွာ မြန်မာပိုင်ဘုန်းကြီးကျောင်းတစ်ကျောင်းတော့ ဖူဆန်မှာ ပေါ်ထွက်လာပါပြီ။ ဝမ်းသာစရာ သတင်းကောင်းပေါ့။ တကယ်က တစ်နှစ်တစ်ကျောင်းတောင် ဝယ်ချင်ရင် ဝယ်နိုင်တဲ့ အခွင့်အရေးက လက်တကမ်းမှာ ရှိနေပါတယ်။

 ကိုရီးယားမှာ ရောက်ရှိစီးပွါးရှာနေကြတဲ့ ရွှေမြန်မာတို့ရဲ့ အရေအတွက်ဟာ တစ်သောင်းကျော်သွားပါပြီ။ အဆင်ပြေသူတွေ ရှိသလို အဆင်မပြေသူတွေလည်း ရှိနေလေရဲ့။ အရင်တစ်ခါ ရေးခဲ့စဉ်က လူဦးရေခြောက်ထောင်ကျော်သာ ရှိခဲ့ပါသေးတယ်။ ခုအချိန်မှာ လူတိုင်းသာ ကိုယ့်မြန်မာပိုင်ကျောင်း    ပေါ်ပေါက်ချင်တယ်ဆိုရင် လွယ်တယ်လို့ ပြောလို့ရပါတယ်။

လူတိုင်း တစ်လလျင် တစ်သောင်းစီ လှူဒါန်းမယ်ဆိုရင် တစ်လလျင် ဝမ် သိန်းတစ်ထောင် စုနိုင်ပါလိမ့်မယ်။ ဒါဆိုရင် တစ်နှစ်ကြာလျင် သိန်းပေါင်း ဆယ့်နှစ်ထောင် (၁၂ ဝေါ့ဗ်) စုနိုင်မှာဖြစ်လို့ တစ်ကျောင်း (အဆောက်အဦးတစ်ခု)ကို ဝယ်ယူလှူဒါန်းနိုင်ပါလိမ့်မယ်။ ကြီးကျယ်လွန်းတဲ့ အဆောက်အဦးကိုတော့ မဆိုလိုပါ။

တချို့ကလည်း လစဉ်အသုံးစရိတ်တွေ လှူဒါန်းမှုတွေအတွက်ကို တွေးပြီး ပူနေကြပါသေးတယ်။ ဒီအတွက်လည်း လစဉ် သုံးထောင်စီ လှူဒါန်းကြမယ်ဆိုရင် သိန်းသုံးရာကို စုဆောင်းနိုင်မှာမို့ ကိုရီးယားမှာရှိတဲ့ ကျောင်းတိုင်းရဲ့ လစဉ်အသုံးစရိတ်အားလုံးကို မျဝေပြီး လှူဒါန်းလိုက်မယ်ဆိုရင် စိတ်ပူပန်စရာ မရှိနိုင်ပါဘူး။
ဒါကြောင့် လစဉ် လူတိုင်း တစ်သောင်း သုံးထောင်ဝမ်စီသာ လှူဒါန်းထည့်ဝင်ကြမယ်ဆိုရင် လစဉ် သိန်းပေါ်င်း တစ်ထောင်သုံးရာစီစုဆောင်းနိုင်ပြီး မြန်မာပိုင် ကျောင်းပေါ်ပေါက်ဘို့၊ လစဉ် အသုံးစရိတ်တွေကိုလည်း ထောက်ပံ့လှူဒါန်းနိုင်မှာအမှန်ပါ။

ဒီလိုနည်းဖြင့်သာ အားလုံးစိတ်ပါဝင်စားစွာ စုဆောင်း စုပေါင်းလှူဒါန်းကြမယ်ဆိုရင် တစ်နှစ်ကို မြန်မာပိုင်ကျေုာင်းတစ်ခု ပေါ်ပေါက်လာနိုင်မှာ မလွဲဧကန်ပါပဲ။
ကိုယ့်ဗုဒ္ဓဘာသာကျောင်းတွေသာ မပေါ်ထွက်လာနိုင်ပေမဲ့ သူများတွေကတော့ အရှိုရှို ပေါ်ထွက်လာနေလေရဲ့။

ကိုယ့်မြန်မာ့ဂုဏ်ဆောင် ကိုယ်ပိုင်ကျောင်းတွေ ပေါ်ပေါက်ချင်တဲ့ ကျောင်းအလှူရှင် ဖြစ်လိုတဲ့ စိတ်ကလေးသာ လူတိုင်းမှာ ရှိကြရင်ဖြင့် မကြာမီသော အချိန်တိုအတွင်းမှာ မြန်မာတို့ရဲ့ဂုဏ်ဆောင် ကျောင်းတော်ကြီးတွေကို တွေ့မြင်နိုင်ကြရမှာပါ။

ချမ်းသာစွာ အိပ်စက်နိုးထနိုင်ကြပါစေ

No comments:

Post a Comment